തൃശൂര്‍: തദ്ദേശ തെരഞ്ഞെടുപ്പില്‍ സ്വര്‍ണവും ഗര്‍ഭവുമല്ല ചര്‍ച്ചാവിഷയമല്ലെമെന്ന് കേന്ദ്രമന്ത്രി സുരേഷ് ഗോപി. വികസനം മാത്രം ചര്‍ച്ചയാകണം എന്നതാണ് തന്റെ അഭിപ്രായമെന്നും ജനങ്ങള്‍ക്ക് വികസന വിഷയങ്ങള്‍ മാത്രമേ ആവശ്യമുളളുവെന്നും സുരേഷ് ഗോപി പറഞ്ഞു. സ്വര്‍ണ-ഗര്‍ഭ കേസുകള്‍ ചര്‍ച്ച ചെയ്യാന്‍ താനില്ലെന്നും തനിക്ക് വികസന ഫോക്കസ് വിടാന്‍ കഴിയില്ലെന്നും സുരേഷ് ഗോപി വ്യക്തമാക്കി. ബിജെപി സ്വര്‍ണക്കൊളള കേസ് സജീവമാക്കുന്നുണ്ടോ എന്ന മാധ്യമപ്രവര്‍ത്തകരുടെ ചോദ്യത്തിന്, അത് അവര്‍ ചെയ്‌തോട്ടെ താണ അതിനില്ല എന്നായിരുന്നു സുരേഷ് ഗോപിയുടെ മറുപടി. സ്വര്‍ണ-ഗര്‍ഭ കേസുകള്‍ ഇല്ലാതെ തന്നെ സ്ഥാനാര്‍ത്ഥികള്‍ വിജയിച്ചുവരട്ടെ എന്നും സുരേഷ് ഗോപി പറഞ്ഞു. രാഹുല്‍ മാങ്കൂട്ടത്തിലിനെതിരായ ബലാത്സംഗക്കേസില്‍ ബിജെപി ശക്തമായ നിലപാട് എടുക്കുന്നതിനിടെയാണ് സുരേഷ് ഗോപിയുടെ പ്രതികരണം.
തെരഞ്ഞെടുപ്പില്‍ ജനങ്ങളെ നേരിട്ട് ബാധിക്കുന്ന വിഷയങ്ങളും വികസനവും ചര്‍ച്ചയാക്കണമെന്നാണ് സുരേഷ് ഗോപിയുടെ നിലപാട്. ശബരിമലയിലെ സ്വര്‍ണപ്പാളി കേസ് ഇടതുപക്ഷത്തിനെതിരെയും രാഹുല്‍ മാങ്കൂട്ടത്തിലിനെതിരായ ബലാത്സംഗ പരാതി കോണ്‍ഗ്രസിനെതിരെയും ബിജെപി ആയുധമാക്കി ഉയര്‍ത്തുന്നതിനിടെയാണ് പാര്‍ട്ടി നിലപാടിന് വിരുദ്ധമായി സുരേഷ് ഗോപിയുടെ പരാമര്‍ശം.
'എന്താണ് കഴിഞ്ഞ 25 വര്‍ഷമായി അവർക്ക് നഷ്ടപ്പട്ടതെന്ന് നമ്മള്‍ ജനങ്ങളെ ബോധ്യപ്പെടുത്തണം. ഞങ്ങള്‍ കഴിഞ്ഞ ദിവസം വികസനരേഖ പുറത്തുകൊണ്ടുവന്നിട്ടുണ്ട്. അത് ജനങ്ങളെ ബോധ്യപ്പെടുത്തി കൊടുത്താല്‍ കേരളം പിടിക്കാന്‍ സാധിക്കും. ജനങ്ങള്‍ക്ക് അതേ വേണ്ടു. മറ്റൊന്നും അവരെ ബാധിക്കില്ല. മറ്റ് ചര്‍ച്ചകള്‍ നടന്നോട്ടെ. എനിക്ക് ഫോക്കസ് വിടാന്‍ വയ്യ. ഒരു ചെമ്പ് കേസ് ഉണ്ടായിരുന്നല്ലോ? ഞാന്‍ എന്തെങ്കിലും അതിനെപ്പറ്റി പറഞ്ഞോ? എന്ത് ബാധ്യതയാണ് അതിനെപ്പറ്റി പറയാനുളളത്? എന്റെ കുടുംബത്തിന്റെ നേര്‍ച്ചയാണത്. സ്വർണവും ഗർഭവും, ആ രണ്ട് ഉല്‍പ്പന്നങ്ങള്‍ ഉപയോഗിക്കാതെ എല്ലാവരും ജയിച്ച് വരട്ടെ': എന്നാണ് സുരേഷ് ഗോപി പറഞ്ഞത്.
Content Highlights: Development should be the focus of discussion in elections, not gold and pregnancy: Suresh Gopi